வெளிநாடுகளில் இருந்து சுவிட்சர்லாந்துக்கு வருபவர்களுக்கு புதிய வரிவிதிப்பு.?

ஐரோப்பிய ஒன்றியத்துடனான ஒப்பந்தத்தில் புதிய குடியேற்ற வரியைச் சேர்க்க சுவிஸ் எம்பிக்கள் திட்டம்

ஐரோப்பிய ஒன்றியத்துடன் மேற்கொள்ளப்படவுள்ள எதிர்கால இருதரப்பு ஒப்பந்தத் தொகுப்பில், பாதுகாப்பு நடவடிக்கைகளின் ஒரு பகுதியாகப் புதிய குடியேற்ற வரியைச் சேர்க்க சுவிட்சர்லாந்து மாநிலங்களின் கவுன்சிலின் அரசியல் நிறுவனங்களுக்கான குழு பரிந்துரைத்துள்ளது. இது தொடர்பான சட்ட முன்வரைவு மீது வரும் செப்டம்பர் 14-ஆம் தேதி தொடங்கவுள்ள நாடாளுமன்ற இலையுதிர்கால கூட்டத்தொடரில் எம்பிக்கள் வாக்கெடுப்பு நடத்தவுள்ளனர்.

இந்த புதிய முன்மொழிவின்படி, சுவிட்சர்லாந்திற்குப் புதிதாகப் பணி நிமித்தமாக வரும் வெளிநாட்டு ஊழியர்களுக்கான வரித் தொகையை அவர்களின் நிறுவனங்களே செலுத்த வேண்டும். அதேபோல, குடும்ப மறுஇணைவு திட்டத்தின் கீழ் சுவிட்சர்லாந்திற்குள் நுழையும் வெளிநாட்டுப் பெரியவர்களுக்கும் இந்த வரி பொருந்தும்.

ஒருவேளை இந்த அவசரகால பாதுகாப்பு விதிமுறை நடைமுறைக்குக் கொண்டுவரப்பட்டால், ஐரோப்பிய ஒன்றியத்தைச் சேர்ந்தவர்கள் மட்டுமின்றி, இந்தியா உள்ளிட்ட ஐரோப்பிய ஒன்றியம் அல்லாத மூன்றாம் நாடுகளைச் சேர்ந்த குடிமக்களுக்கும் இந்த வரி விதிப்பு பொருந்தும் என்று தெரிவிக்கப்பட்டுள்ளது.

சுவிட்சர்லாந்தில் அதிகரித்து வரும் வெளிநாட்டினரின் குடியேற்றத்தைக் கட்டுப்படுத்தவும், நாட்டின் உள்கட்டமைப்பைப் பாதுகாக்கவும் இந்த நடவடிக்கை திட்டமிடப்பட்டு வருகிறது.