ஆல்ப்ஸ் மலைத்தொடரில் முன்னெப்போதும் இல்லாத அளவுக்கு பாறைச்சரிவுகள் ஏற்படும் அபாயம்!

ஆல்ப்ஸ் மலைத்தொடரில் முன்னெப்போதும் இல்லாத அளவுக்கு பாறைச்சரிவுகள் ஏற்படும் அபாயம்!

2026ஆம் ஆண்டின் கடுமையான கோடைக்கால வெப்பம் காரணமாக, ஆல்ப்ஸ் மலைப்பகுதியில் இந்த ஆண்டு சாதனை அளவில் பாறைச்சரிவுகள் ஏற்படலாம் என ஆராய்ச்சியாளர்கள் எச்சரித்துள்ளனர்.

பிரெஞ்சு ஆராய்ச்சியாளர்களின் கணிப்புப்படி, மான்ட் பிளாங்க் மலைத்தொடரில் மட்டும் சுமார் 450 பெரிய பாறைச்சரிவுகள் ஏற்படக்கூடும்.

பாறைச்சரிவுகளின் எண்ணிக்கை மட்டுமின்றி, சரிந்து விழும் பாறைகளின் அளவிலும் 2026ஆம் ஆண்டு சாதனை ஆண்டாக அமையலாம் என பிரெஞ்சு தேசிய அறிவியல் ஆராய்ச்சி மையமான CNRS-ஐச் சேர்ந்த நிலவடிவவியலாளர் லுடோவிக் ராவனெல் தெரிவித்துள்ளார்.

இதற்கு முக்கிய காரணமாக காலநிலை மாற்றத்தால் அதிகரித்து வரும் வெப்பநிலை சுட்டிக்காட்டப்படுகிறது.

ஆயிரக்கணக்கான ஆண்டுகளாக உறைந்திருக்கும் நிரந்தரப் பனியானது, மலைப் பாறைகளின் பிளவுகளுக்குள் இயற்கையான ‘சிமெண்ட்’ போல செயல்படுகிறது. அந்தப் பனி உருகும்போது, பாறைகள் நிலையிழந்து சரிந்து விழும் அபாயம் அதிகரிக்கிறது.

அதேபோல், பனியாறுகள் வேகமாக பின்வாங்குவதும் மலைப்பாறைகளின் நிலைத்தன்மையை பாதிக்கக்கூடும்.

இதனால் குறிப்பாக மலையேறுபவர்கள் மற்றும் உயரமான மலைப்பகுதிகளுக்குச் செல்லும் சுற்றுலாப் பயணிகள் கூடுதல் ஆபத்தை எதிர்கொள்ள நேரிடும் என எச்சரிக்கை விடுக்கப்பட்டுள்ளது.

எனினும், உயரமான மலைப்பகுதிகளுக்கு முழுமையான தடை விதிப்பதை ஆராய்ச்சியாளர்கள் ஆதரிக்கவில்லை.

ஆல்ப்ஸ் மலைத்தொடரில் இயற்கை மாற்றங்கள் தொடர்ந்து தீவிரமடைந்து வரும் நிலையில், இந்த கோடைக்காலம் எவ்வளவு ஆபத்தானதாக மாறும் என்பது பெரும் கேள்வியாகியுள்ளது.