“2026-ல் சுவிஸ் பொருளாதாரம் வளருமா? IMF வெளியிட்ட எதிர்பார்ப்பு!”

“2026-ல் சுவிஸ் பொருளாதாரம் வளருமா? IMF வெளியிட்ட எதிர்பார்ப்பு!”

உலகளாவிய பொருளாதார சவால்களுக்கு மத்தியிலும் சுவிட்சர்லாந்தின் பொருளாதாரம் வலிமையாக இருப்பதாக சர்வதேச நாணய நிதியம், IMF பாராட்டு தெரிவித்துள்ளது.

வலுவான பொருளாதாரம், குறைந்த பணவீக்கம் மற்றும் நிலையான அரசியல் சூழல் ஆகியவை சுவிட்சர்லாந்தின் முக்கிய பலமாக இருப்பதாக IMF தனது புதிய அறிக்கையில் தெரிவித்துள்ளது.

உலகளாவிய பதற்றங்கள், எரிசக்தி விலை உயர்வு மற்றும் சர்வதேச வர்த்தக சவால்கள் இருந்தாலும், சுவிஸ் பொருளாதாரம் அவற்றை சமாளிக்கும் திறனை காட்டியுள்ளது என IMF குறிப்பிட்டுள்ளது.

IMF கணிப்பின்படி, 2026 ஆம் ஆண்டில் சுவிட்சர்லாந்தின் பொருளாதார வளர்ச்சி சுமார் 0.8 சதவீதமாக இருக்கும் என எதிர்பார்க்கப்படுகிறது. அதற்கு அடுத்த ஆண்டு வளர்ச்சி மேலும் அதிகரித்து 1.5 சதவீதமாக இருக்கும் என கணிக்கப்பட்டுள்ளது.

மேலும், சுவிட்சர்லாந்தில் பணவீக்கம் தொடர்ந்து குறைந்த நிலையில் இருக்கும் என IMF தெரிவித்துள்ளது. 2026 மற்றும் 2027 ஆண்டுகளில் பணவீக்கம் சுமார் 0.6 சதவீதமாக இருக்கும் என எதிர்பார்க்கப்படுகிறது.

சுவிஸ் ஃபிராங்கின் வலிமையும் பணவீக்கத்தை கட்டுப்படுத்த உதவியுள்ளதாக IMF தெரிவித்துள்ளது.

நிதி நிர்வாகத்தில் சுவிட்சர்லாந்தின் கடன் கட்டுப்பாட்டு முறை நம்பகமானதாக இருப்பதாகவும், இது எதிர்கால அவசர செலவுகளை சமாளிக்க உதவும் என்றும் பாராட்டு தெரிவித்துள்ளது.

அதே நேரத்தில், ஓய்வூதியம், சுகாதாரம் மற்றும் பாதுகாப்பு செலவுகள் அதிகரிக்கும் நிலையில் எதிர்கால நிதி சவால்களை கவனிக்க வேண்டும் என எச்சரிக்கப்பட்டுள்ளது.

வங்கி துறையில், குறிப்பாக பெரிய வங்கிகளுக்கான பாதுகாப்பு விதிகளை வலுப்படுத்தும் சுவிஸ் நடவடிக்கைகளையும் IMF வரவேற்றுள்ளது.

மொத்தத்தில், உலக பொருளாதார அசாதாரண சூழலிலும் சுவிட்சர்லாந்தின் நிதி நிலைத்தன்மை வலுவாக இருப்பதாக இந்த அறிக்கை சுட்டிக்காட்டுகிறது.