உலகக்கிண்ண வெற்றிக் கொண்டாட்டத்திற்கு வோ (Vaud) கன்டோனில் சிறப்பு தளர்வு

உலகக்கிண்ண வெற்றிக் கொண்டாட்டத்திற்கு வோ (Vaud) கன்டோனில் சிறப்பு தளர்வு

அமெரிக்காவில் நடைபெற்று வரும் FIFA உலகக்கிண்ணப் போட்டிகளில் சுவிட்சர்லாந்து தேசிய அணி வெற்றி பெற்றால், ரசிகர்கள் கொண்டாடுவதற்காக வோ கன்டோன் (Vaud) அதிகாரிகள் வரையறுக்கப்பட்ட அளவில் சிறப்பு அனுமதி வழங்க முடிவு செய்துள்ளனர்.

வோ கன்டோனல் காவல் துறையின் அறிவிப்பின்படி, சுவிஸ் தேசிய அணி வெற்றி பெறும் போட்டிகளுக்குப் பிறகு ரசிகர்கள் வாகன அணிவகுப்பாகச் சென்று ஹோர்ன் அடித்து மகிழ்ச்சியை வெளிப்படுத்த அனுமதிக்கப்படுவர். இருப்பினும் இந்த அனுமதி குறிப்பிட்ட நேர வரம்பிற்குள் மட்டுமே வழங்கப்படும்.

போட்டி முடிந்த பின்னர் அதிகபட்சமாக 60 நிமிடங்கள் மட்டுமே இவ்வாறான கொண்டாட்டங்கள் நடைபெற முடியும். அதன்பிறகு ஹோர்ன் அடிப்பது அல்லது சத்தமிட்டு கொண்டாடுவது அனுமதிக்கப்படாது என்று அதிகாரிகள் தெளிவுபடுத்தியுள்ளனர்.

மேலும், இரவு 10 மணிக்குப் பிறகு பொதுமக்களின் இரவு ஓய்வை பாதிக்கக்கூடிய வகையில் சத்தமிட்டு கொண்டாடுவதைத் தவிர்க்குமாறும் ரசிகர்களிடம் கோரிக்கை விடுக்கப்பட்டுள்ளது.

“ஆதரவாளர்கள் தங்களின் மகிழ்ச்சியை வெளிப்படுத்தலாம். ஆனால் இரவு நேர அமைதியையும் மக்களின் ஓய்வையும் மதித்து, கட்டுப்பாடுடன் மற்றும் பொறுப்புணர்வுடன் கொண்டாட வேண்டும்” என்று காவல்துறை தெரிவித்துள்ளது.

சுவிட்சர்லாந்தில் நடைபெறும் பெரிய விளையாட்டு வெற்றிகளுக்குப் பிறகு வாகன ஹோர்ன்கள், கொடி அணிவகுப்புகள் மற்றும் தெரு கொண்டாட்டங்கள் வழக்கமாக இடம்பெறுகின்றன. எனினும், குடியிருப்பு பகுதிகளில் அதிக சத்தம் ஏற்படுவது குறித்து பொதுமக்களிடமிருந்து அடிக்கடி புகார்கள் எழுவதால், இந்த முறை வோ கன்டோன் அதிகாரிகள் தெளிவான விதிமுறைகளை அறிவித்துள்ளனர்.