Temu மற்றும் Shein போன்ற தளங்களுக்கு கடுமையான கட்டுப்பாடுகள்: சுவிஸ் நாடாளுமன்றத்தில் புதிய முயற்சி

Temu மற்றும் Shein போன்ற தளங்களுக்கு கடுமையான கட்டுப்பாடுகள்: சுவிஸ் நாடாளுமன்றத்தில் புதிய முயற்சி

சீனாவைச் சேர்ந்த Temu மற்றும் Shein போன்ற ஆன்லைன் விற்பனை தளங்களுக்கு எதிராக சுவிட்சர்லாந்தில் கடுமையான கட்டுப்பாடுகளை கொண்டு வர அரசியல் அழுத்தம் அதிகரித்து வருகிறது.

இதற்கான முக்கிய முன்னேற்றமாக, நாடாளுமன்றத்தின் தேசிய கவுன்சில் (National Council), உறுப்பினர் ஃபாபியோ ரெகாச்சி (Fabio Regazzi) முன்வைத்த தீர்மானத்தை ஏற்றுக்கொண்டுள்ளது.

இந்த தீர்மானத்தின் படி, வெளிநாட்டு பெரிய ஆன்லைன் விற்பனையாளர்களிடமிருந்து சுவிட்சர்லாந்திற்கு வரும் சிறிய பார்சல்களுக்கு புதிய வரி விதிக்கப்பட வேண்டும் என கோரப்பட்டுள்ளது.

தீர்மானத்தில் குறிப்பிடப்பட்டதன்படி, சீனாவில் இருந்து ஒவ்வொரு ஆண்டும் சுமார் ஐந்து இலட்சம் பார்சல்கள் குறைந்த சுங்க கட்டணங்களுடன் மற்றும் போதுமான பரிசோதனைகள் இன்றி சுவிட்சர்லாந்துக்கு வருகின்றன. இதனால் கடுமையான விதிமுறைகளுக்கு உட்பட்டுள்ள சுவிஸ் நிறுவனங்களுக்கு நியாயமற்ற போட்டி நிலை உருவாகிறது என கூறப்பட்டுள்ளது.

சுவிட்சர்லாந்து நிறுவனங்கள் தரநிலைகள், சுற்றுச்சூழல் மற்றும் தொழிலாளர் விதிமுறைகளை கடைப்பிடிக்க வேண்டிய கட்டாயத்தில் உள்ள நிலையில், வெளிநாட்டு நிறுவனங்கள் அதே அளவிலான கட்டுப்பாடுகளுக்கு உட்படவில்லை என்ற குற்றச்சாட்டும் முன்வைக்கப்பட்டுள்ளது.

இதனால், வெளிநாட்டிலிருந்து வரும் பார்சல்களுக்கு மேம்பட்ட கண்காணிப்பு மற்றும் கட்டுப்பாட்டு முறைமை அமைக்க வேண்டும் என தீர்மானம் வலியுறுத்துகிறது. இந்த புதிய கண்காணிப்பு அமைப்புக்கான செலவுகள், அந்த பார்சல்களுக்கு விதிக்கப்படும் வரி மூலம் ஈடு செய்யப்பட வேண்டும் என்றும் குறிப்பிடப்பட்டுள்ளது.

இந்த விவகாரம் தற்போது சுவிட்சர்லாந்தில் உள்ளூர் வணிக பாதுகாப்பு, சர்வதேச இ-காமர்ஸ் போட்டி மற்றும் சுங்கக் கட்டுப்பாடுகள் குறித்து புதிய அரசியல் விவாதத்தை உருவாக்கியுள்ளது.