போலீசை ஏமாற்றி தப்பியோட்டம்: சென்ட்கேலனில் தொடர் விபத்து, பெரும் சேதம்

போலீசை ஏமாற்றி தப்பியோட்டம்: சென்ட்கேலனில் தொடர் விபத்து, பெரும் சேதம்

சென்ட்கேலன் பகுதியில் சனிக்கிழமை இரவு போலீஸ் துரத்தலில் ஈடுபட்ட 35 வயதுடைய கார் ஓட்டுநர், பல வாகனங்களுடன் மோதியதுடன், போலீசாரை எதிர்த்து வன்முறையிலும் ஈடுபட்ட சம்பவம் பெரும் பரபரப்பை ஏற்படுத்தியுள்ளது. இந்த சம்பவத்தில் சுமார் 1.5 லட்சம் சுவிஸ் ஃபிராங்க் மதிப்பிலான சொத்து சேதம் ஏற்பட்டுள்ளதாக அதிகாரிகள் தெரிவித்துள்ளனர்.

போலீஸ் தகவலின்படி, இரவு 9 மணிக்கு சற்று முன், அந்த நபர் A1 நெடுஞ்சாலையில் St. Gallen–Winkeln பகுதியிலிருந்து St. Margrethen நோக்கி காரை ஓட்டிச் சென்றார். அவரது ஓட்டும் விதம் சந்தேகமாக இருந்ததால், சென்ட்காலன் நகர போலீசார் வாகனக் குழு அவரை நிறுத்த முயன்றது. ஒளி குறியீடுகள் மூலம் வாகனத்தை நிறுத்துமாறு அறிவுறுத்தப்பட்ட போதிலும், ஓட்டுநர் அதனைப் புறக்கணித்து வேகமாக சென்றதுடன், St. Gallen–St. Fiden வெளியேற்றம் வழியாக நெடுஞ்சாலையை விட்டு வெளியேறினார்.

இதனைத் தொடர்ந்து போலீசார் துரத்தலைத் தொடங்கினர். ரோர்ஷாக்கர் ஸ்ட்ராஸே வழியாக ஃப்ளூர்‌ஹோஃப்‌ஸ்ட்ராஸே சென்ற போது, தப்பியோடிய கார் பல நிறுத்தப்பட்டிருந்த வாகனங்களிலும், எதிரே வந்த சென்ட்காலன் நகர போலீசாரின் வாகனத்திலும் மோதி விபத்துக்குள்ளானது. அதற்குப்பிறகும், ஓட்டுநர் வாகனத்திலிருந்து வெளியேற மறுத்து, மீண்டும் ஓட்ட முயற்சித்தபோது, மற்றொரு காவல் வாகனத்துடன் மோதினார். இதனால் அவரது கார் முழுமையாக செயலிழந்தது.

பின்னர் நடந்த கைது நடவடிக்கையின் போது, அந்த 35 வயதுடைய நபர் கடுமையாக எதிர்த்ததாக போலீசார் தெரிவித்துள்ளனர். பரிசோதனைகளின் அடிப்படையில், அவர் வாகனம் ஓட்ட தகுதி இல்லாத நிலையில் இருந்ததாகவும், அவரது இரத்தம் மற்றும் சிறுநீர் மாதிரிகள் எடுக்கப்பட்டதுடன், ஓட்டுநர் உரிமமும் பறிமுதல் செய்யப்பட்டதாகவும் கூறப்பட்டுள்ளது. முன்னெச்சரிக்கை நடவடிக்கையாக, இரண்டு போலீசார் மருத்துவமனைக்கு அனுப்பப்பட்டனர். இதில் ஒருவர் லேசான காயமடைந்திருக்கலாம் என முதற்கட்ட தகவல்கள் தெரிவிக்கின்றன.

இந்த விபத்து தொடர்பான விசாரணையை சென்ட்கேலன் கன்டோனல் போலீசார் மேற்கொண்டுள்ளது. மேலும், போலீசை ஏமாற்றி தப்பிச் செல்லும் முயற்சிக்கு முன்பு, அந்த நபர் Abtwil பகுதியில் உள்ள Wiesenbachstrasse-ல் ஒரு உலோக கம்பத்தையும், நிலத்தடி கார் நிறுத்தத்தின் வெளியேற்ற தடுப்பையும் சேதப்படுத்தியதாகவும், சேதத்தை அறிவிக்காமல் அங்கிருந்து சென்றதாகவும் தெரியவந்துள்ளது.

அப்பென்செல் அவுசர்ரோடன் கன்டோனில் வசிக்கும் சுவிஸ் குடிமகனான இந்த நபர் மீது, சென்ட்கேலன் கன்டோனின் அரசு வழக்கறிஞர் அலுவலகத்தில் புகார் பதிவு செய்யப்பட்டுள்ளது. சம்பவத்தைப் பார்த்தவர்கள் அல்லது தகவல் வழங்கக்கூடியவர்கள், Oberbüren காவல் நிலையத்தை தொடர்புகொள்ளுமாறு சென்ட்கேலன் கன்டோனல் காவல் துறை பொதுமக்களை கேட்டுக்கொண்டுள்ளது.

© Kapo SG