நியோனில் அதிகாலை ஆடம்பரக் கடை கொள்ளை! 4 பிரெஞ்சு கொள்ளையர்கள் கைது!
சுவிட்சர்லாந்தின் நியோன் நகரில் அதிகாலை இடம்பெற்ற ஆடம்பரக் கடை கொள்ளை சம்பவம் பரபரப்பை ஏற்படுத்தியுள்ளது!
ஆகஸ்ட் 5ஆம் தேதி புதன்கிழமை அதிகாலை சுமார் 4 மணி 15 நிமிடங்களுக்கு, நியோனில் உள்ள ஒரு கடைக்குள் பலர் புகுந்து கொள்ளையடித்துவிட்டு காரில் தப்பிச் சென்றதாக வாட் காவல்துறைக்கு தகவல் கிடைத்தது.
முதற்கட்ட விசாரணையின்படி, மூன்று பேர் கடைக்குள் புகுந்த நிலையில், நான்காவது நபர் தப்பிச் செல்லும் வாகனத்தில் காத்திருந்ததாக தெரிவிக்கப்பட்டுள்ளது.
தகவல் கிடைத்ததும் ஜெண்டர்மெரி மற்றும் நியோன் பிராந்திய காவல்துறையினர் இணைந்து உடனடியாக தேடுதல் நடவடிக்கையை ஆரம்பித்தனர்.
கொள்ளையர்கள் பயன்படுத்தியதாக சந்தேகிக்கப்படும் கார் சிறிது நேரத்திலேயே அடையாளம் காணப்பட்டது.
ஆனால் காவல்துறையினர் காரை நிறுத்துமாறு சைகை செய்தபோது, ஓட்டுநர் அதை பொருட்படுத்தாமல் வேகமாக தப்பிச் செல்ல முயன்றுள்ளார்.
இதன்போது பல போக்குவரத்து விதிமீறல்களில் ஈடுபட்ட அந்த வாகனம் இறுதியில் கட்டுப்பாட்டை இழந்து விபத்துக்குள்ளானது.
காரில் இருந்த நான்கு பேரும் உடனடியாக வாகனத்தை கைவிட்டு கால்நடையாக தப்பிச் செல்ல முயன்றுள்ளனர்.
ஆனால் காவல்துறையினர் அவர்களை சிறிது நேரத்திலேயே மடக்கிப் பிடித்தனர்.
அவர்களிடமிருந்து கொள்ளையடிக்கப்பட்டதாக சந்தேகிக்கப்படும் பல விலையுயர்ந்த கைப்பைகள் மீட்கப்பட்டுள்ளன.
கைது செய்யப்பட்ட நால்வரும் பிரான்சில் வசிக்கும் 16 முதல் 18 வயதுக்குட்பட்ட பிரெஞ்சு நாட்டவர்கள் என தெரிவிக்கப்பட்டுள்ளது.
விபத்தில் மூன்று சிறார்களில் ஒருவருக்கு சிறிய காயங்கள் ஏற்பட்டுள்ளன.
நான்கு பேரும் தற்போது நீதிமன்றக் காவலில் வைக்கப்பட்டுள்ள நிலையில், வாட் அரசு வழக்கறிஞர் அலுவலகம் மற்றும் சிறார் நீதிமன்றத்தின் வழிகாட்டுதலின் கீழ் விசாரணை தொடர்ந்து நடைபெற்று வருகிறது.
