சுவிட்சர்லாந்தில் ஏர் கண்டிஷனர், விசிறிகளுக்கு கடும் தட்டுப்பாடு

அடுத்த வெப்ப அலைக்கு முன் சுவிட்சர்லாந்தில் ஏர் கண்டிஷனர், விசிறிகளுக்கு கடும் தட்டுப்பாடு

சுவிட்சர்லாந்தில் மீண்டும் கடும் வெப்ப அலை வீசும் என்ற வானிலை முன்னறிவிப்பைத் தொடர்ந்து, ஏர் கண்டிஷனர்கள் மற்றும் மின்விசிறிகளை வாங்க பொதுமக்கள் அதிக அளவில் முன்வருவதால், நாடு முழுவதும் இவற்றிற்கு கடும் தட்டுப்பாடு ஏற்பட்டுள்ளதாக முன்னணி சில்லறை விற்பனையாளர்கள் எச்சரித்துள்ளனர்.

ஆன்லைன் விற்பனை நிறுவனமான Galaxus வெளியிட்ட தகவலின்படி, இந்த ஆண்டு ஜூன் மாதத்தில் ஏர் கண்டிஷனர் மற்றும் குளிரூட்டும் சாதனங்களின் விற்பனை, கடந்த ஜூன் மாதத்தில் பதிவான சாதனை அளவைக் காட்டிலும் 38 சதவீதம் அதிகரித்துள்ளது. இதன் காரணமாக Galaxus மட்டுமல்லாமல் Jumbo, Fust மற்றும் Fnac உள்ளிட்ட முக்கிய விற்பனை நிறுவனங்களின் கையிருப்புகளும் தற்போது கிட்டத்தட்ட முழுமையாக தீர்ந்துவிட்டதாக தெரிவிக்கப்பட்டுள்ளது.

புதிய பொருட்கள் பெரும்பாலும் ஆசிய நாடுகளில் இருந்து இறக்குமதி செய்யப்படுகின்றன. ஆனால் அடுத்த சரக்குகள் கோடை காலத்தின் இறுதிவரை வர வாய்ப்பில்லை என்பதால், இந்த வாரம் பதிவு செய்யப்படும் சில ஆர்டர்கள் ஆகஸ்ட் நடுப்பகுதி அல்லது செப்டம்பர் மாதத்தில்தான் வாடிக்கையாளர்களுக்கு கிடைக்கும் என விற்பனையாளர்கள் தெரிவித்துள்ளனர்.

மேலும், ஐரோப்பாவில் கிடைத்திருந்த குளிரூட்டும் சாதனங்களின் பெரும்பாலான கையிருப்புகளை அரசுத் துறைகள் மற்றும் பொது நிறுவனங்கள் ஏற்கனவே அதிகளவில் வாங்கியிருப்பதாக Fnac தெரிவித்துள்ளது. இதனால் பொதுமக்களுக்கு கிடைக்கும் பொருட்களின் எண்ணிக்கை மேலும் குறைந்துள்ளதாக கூறப்படுகிறது.

வானிலை ஆய்வு மையங்கள் இந்த வாரத்தின் நடுப்பகுதியிலிருந்து சுவிட்சர்லாந்தில் மீண்டும் ஒரு வார காலம் கடுமையான வெப்ப அலை நிலவும் என முன்னறிவித்துள்ள நிலையில், குளிரூட்டும் சாதனங்களை வாங்கத் திட்டமிட்டுள்ளவர்கள் தாமதித்தால், சந்தையில் தேர்வு செய்யக்கூடிய பொருட்கள் மிகவும் குறைந்து போகலாம் என்று விற்பனையாளர்கள் எச்சரிக்கை விடுத்துள்ளனர். WRS