சுவிட்சர்லாந்து சிறைகளில் கைதிகள் எண்ணிக்கை புதிய சாதனை
சுவிட்சர்லாந்தில் 2026ஆம் ஆண்டு தொடக்கத்தில் இதுவரை இல்லாத அளவுக்கு அதிகமானோர் சிறைகளில் அடைக்கப்பட்டிருந்ததாக புதிய புள்ளிவிவரங்கள் தெரிவிக்கின்றன.
சுவிட்சர்லாந்து மத்திய புள்ளிவிவர அலுவலகம் (BFS) வெளியிட்ட தகவலின்படி, கடந்த ஆண்டு மட்டும் பெரியவர்களுக்கு எதிராக 1,11,962 தண்டனை தீர்ப்புகள் குற்றப் பதிவேட்டில் பதிவு செய்யப்பட்டுள்ளன.
அவற்றில் பாதிக்கும் மேற்பட்ட வழக்குகள் சாலைப் போக்குவரத்து சட்ட மீறல்களுடன் தொடர்புடையவை என தெரிவிக்கப்பட்டுள்ளது.
அதேவேளை, குறுகிய கால கட்டாய சிறைத்தண்டனைகள் வரலாற்றிலேயே மிகக் குறைந்த அளவுக்கு சரிந்துள்ளன. கடந்த ஆண்டு இத்தகைய தண்டனைகள் வெறும் 2,937 மட்டுமே பதிவாகியுள்ளன.
இதற்குப் பதிலாக, நிபந்தனையுடன் வழங்கப்படும் பண அபராத தண்டனைகள் அதிகமாக பயன்படுத்தப்பட்டுள்ளன. மொத்தம் 78,693 வழக்குகளில் இந்த வகை தண்டனைகள் வழங்கப்பட்டதாக BFS தெரிவித்துள்ளது.
இதற்கிடையில், அதிகமான கைதிகள் காரணமாக சுவிட்சர்லாந்தின் சிறைகள் மற்றும் தண்டனை அமலாக்க மையங்களில் நிரப்பளவு 97 சதவீதத்தை எட்டியுள்ளது. மொத்தம் 7,119 கைதிகளில் 63 சதவீதத்தினர் தண்டனை அனுபவித்தோ அல்லது விசேட கண்காணிப்பு நடவடிக்கைகளின் கீழோ இருந்ததாக தெரிவிக்கப்பட்டுள்ளது.
மேலும், நாட்டை விட்டு வெளியேற்ற உத்தரவுகள் கடந்த ஆண்டும் நிலையான அளவிலேயே தொடர்ந்துள்ளன. மொத்தம் 2,272 “Landesverweisungen” அல்லது நாடுகடத்தல் உத்தரவுகள் பதிவாகியுள்ளன.
