வெடிப்புச் சம்பவம், திருட்டைத் தொடர்ந்து முட்டை வீச்சு!
சுவிட்சர்லாந்தின் ஆர்பான் (Arbon) நகரில் உள்ள ‘ஆர்பான் ஃபுட் ஹவுஸ்’ (Arbon Food House) உணவகத்தின் மீது அடையாளம் தெரியாத மர்ம நபர்கள் தொடர்ந்து மூன்றாவது முறையாக முட்டைகளை வீசித் தாக்குதல் நடத்தியுள்ள சம்பவம் பரபரப்பை ஏற்படுத்தியுள்ளது.
‘காலர்ஸ்ட்ராஸ்’ (Gallerstrasse) பகுதியில் அமைந்துள்ள இந்த உணவகம், கடந்த பல வாரங்களாகத் திட்டமிட்ட தாக்குதல்களுக்கு உள்ளாகி வருவதாக வாடகைதாரர் தம்பதியினரான எட்ரிஸ் ஜமால்சாதே மற்றும் சோமையா அக்பரி ஆகியோர் குற்றம் சாட்டியுள்ளனர். செவ்வாய்க்கிழமை இரவு உணவகத்தின் மீது நடத்தப்பட்ட தாக்குதலின்போது, வெள்ளி நிற கார் ஒன்று பலமுறை அந்த இடத்தைக் கடந்து செல்வது கண்காணிப்பு கேமராவில் பதிவாகியுள்ளது.
இந்தத் தொடர் தாக்குதல்களுக்குப் பின்னால் தங்களது தொழில் போட்டியாளர் ஒருவர் இருக்கலாம் என இந்தத் தம்பதியினர் சந்தேகிக்கின்றனர். முட்டை வீச்சு சம்பவங்களுக்கு முன்பு சிலர் உணவகம் செயல்படும் நேரம் குறித்துத் தீவிரமாக விசாரித்ததாகவும், வாடிக்கையாளர்களை விரட்டியடிப்பதற்காகப் போட்டியாளரின் ஊழியர்கள் ஏற்கனவே வாக்குவாதத்தில் ஈடுபட்டதாகத் தகவல் கிடைத்துள்ளதாகவும் அவர்கள் தெரிவித்துள்ளனர்.
கடந்த ஜூன் மாதம் நிகழ்ந்த வெடிப்புச் சம்பவம் மற்றும் திருட்டு முயற்சிகளால் உணவகத் திறப்பு ஒன்றரை மாதங்கள் தாமதமான நிலையிலேயே தற்போது மீண்டும் இத்தாக்குதல் நடந்துள்ளது. இது குறித்துக் காவல் துறையில் முறைப்படி புகார் அளிக்கப்பட்டுள்ள நிலையில், கண்காணிப்பு கேமரா காட்சிகளைக் கொண்டு போலீசார் தீவிர விசாரணை மேற்கொண்டு வருகின்றனர்.
