சூரிச்சில் குழந்தைகள் மீது கத்திக்குத்து – 15 ஆண்டுகள் சிறை
2024ஆம் ஆண்டு சுவிட்சர்லாந்தின் சூரிச் நகரில் பகல்நேர குழந்தை பராமரிப்பு நிலையத்துக்குச் சென்றுகொண்டிருந்த சிறுவர்கள் மீது கத்திக்குத்து தாக்குதல் நடத்திய சீன நாட்டைச் சேர்ந்த ஒருவருக்கு 15 ஆண்டுகள் சிறைத்தண்டனை விதிக்கப்பட்டுள்ளது.
அப்போது 23 வயதாக இருந்த அந்த நபர், 2024 அக்டோபர் 1ஆம் தேதி குடியிருப்பு பகுதியில் குழந்தைகள் குழுவை கத்தியால் தாக்கியதாக நீதிமன்றத்தில் நிரூபிக்கப்பட்டது. இந்த தாக்குதலில் ஐந்து வயதுடைய மூன்று சிறுவர்கள் காயமடைந்து மருத்துவமனையில் அனுமதிக்கப்பட்டனர்.
குழந்தைகளுடன் சென்றுகொண்டிருந்த பராமரிப்பு பணியாளர் மற்றும் அங்கு இருந்த ஒருவர் இணைந்து தாக்குதல் நடத்திய நபரை கட்டுப்படுத்தினர். பின்னர் அவர் சம்பவ இடத்திலேயே கைது செய்யப்பட்டார். சுவிட்சர்லாந்தில் கல்வி பயின்று வந்த அவர், விசாரணையின்போது தாக்குதலை ஒப்புக்கொண்டதாக அரசுத் தரப்பு தெரிவித்துள்ளது.
தாக்குதல் தொடர்பாக சூரிச் நீதிமன்றம் அவரை கொலை முயற்சி குற்றத்தில் குற்றவாளியாக அறிவித்துள்ளது. நீதிபதி, அவர் மிகவும் திட்டமிட்டும் இரக்கமின்றியும் செயல்பட்டதாகக் குறிப்பிட்டார். எனினும், அவரது வழக்கறிஞர் மனநல மருத்துவ அறிக்கையை முன்வைத்து, சம்பவம் நடைபெற்றபோது அவர் தனது செயல்களுக்கு முழுமையாக பொறுப்பேற்கும் நிலையில் இல்லை என வாதிட்டார்.
விசாரணையின்போது, தாக்குதலுக்கு மூன்று வாரங்களுக்கு முன்பு தனது மனதில் ஒரு குரல் குழந்தைகளைக் கொல்லுமாறு கூறியதாக அந்த நபர் நீதிமன்றத்தில் தெரிவித்ததாக Keystone-ATS செய்தி நிறுவனம் தெரிவித்துள்ளது. ஆனால், விசாரணையின் ஆரம்ப கட்டங்களில் அவர் இதுபற்றி எதுவும் கூறவில்லை என அரசுத் தரப்பு இந்த விளக்கத்தை நிராகரித்தது.
மேலும், தாக்குதல் திடீரென இடம்பெற்றது அல்ல என்றும், பல வாரங்களுக்கு முன்பே அவர் அதனை திட்டமிட்டிருந்ததாகவும் அரசுத் தரப்பு வாதிட்டது. 2024 ஆகஸ்ட் மாதத்தில், சீரற்ற முறையில் ஒருவரைக் கத்தியால் தாக்கினால் எதிர்கொள்ள வேண்டிய சட்டரீதியான விளைவுகள் குறித்து ChatGPT-யிடம் அவர் கேட்டதாகவும், மனித உடலமைப்பு தொடர்பான தகவல்களையும் தேடியதாகவும் குற்றப்பத்திரிகையில் குறிப்பிடப்பட்டுள்ளது.
விதிக்கப்பட்ட 15 ஆண்டுகள் சிறைத்தண்டனைக்கு எதிராக அவர் மேல்முறையீடு செய்ய உள்ளதாக தெரிவிக்கப்பட்டுள்ளது.
