சுவிட்சர்லாந்தை மின் தட்டுப்பாட்டில் இருந்து காப்பாற்றிய சூரிய ஒளி ஆற்றல்

சுவிட்சர்லாந்தை மின் தட்டுப்பாட்டில் இருந்து காப்பாற்றிய சூரிய ஒளி ஆற்றல்…

சுவிட்சர்லாந்தில் கடந்த சில வாரங்களாக நிலவி வரும் கடுமையான வறட்சி மற்றும் போதிய மழையின்மை காரணமாக, நதிகளின் நீர்மட்டம் மிகவும் கவலைக்கிடமான நிலைக்குக் குறைந்துள்ளது. பெரும்பாலான நீரோடைகள் வறண்டு சிறு ஓடைகளாக சுருங்கியுள்ளன. குறிப்பாக, ஆரே, ரைன் மற்றும் ரோன் போன்ற நாட்டின் முக்கிய நதிகளில் நீர்வரத்து வரலாறு காணாத அளவுக்குக் குறைந்துள்ளது.

இந்த எதிர்பாராத வறட்சி, நாட்டின் மின்சார உற்பத்தியில் பெரும் தாக்கத்தை ஏற்படுத்தியுள்ளது. சுவிட்சர்லாந்தின் மின் தேவையில் பெரும்பகுதியைப் பூர்த்தி செய்யும் நீர்மின் நிலையங்களில் மின் உற்பத்தி பல ஆண்டுகளின் சராசரியை விட வெகுவாக சரிந்துள்ளது. மேலும், நதிநீரின் வெப்பம் அதிகரித்ததால், பெஸ்னாவ் அணுமின் நிலையத்தின் இரண்டு உலைகளும் இந்த கோடைகாலத்தில் தற்காலிகமாக மூடப்பட்டன. இதனால் நாட்டில் பெரும் மின்தட்டுப்பாடு ஏற்படும் அபாயம் நிலவியது.

இருப்பினும், இவ்வளவு நெருக்கடியான சூழ்நிலையிலும் சுவிட்சர்லாந்து தற்போது எந்தவொரு மின்சாரத் தட்டுப்பாட்டையும் எதிர்கொள்ளவில்லை. இதற்கு முக்கியக் காரணம் சூரிய ஒளி ஆற்றல் தான். கடந்த சில ஆண்டுகளில் சுவிட்சர்லாந்தில் சூரிய ஒளி மின் தகடுகள் பரவலாக நிறுவப்பட்டதாலும், கோடைகாலத்தில் அதிக நேரம் வெயில் அடிப்பதாலும் சூரிய ஒளி மின் உற்பத்தி உச்சத்தை எட்டியுள்ளது. நீர்மின்சாரம் மற்றும் அணுமின் உற்பத்தியில் ஏற்பட்ட பற்றாக்குறையை, தடையில்லாமல் கிடைக்கும் இந்த சூரிய ஒளி ஆற்றல் முழுமையாக ஈடுசெய்து சுவிட்சர்லாந்தை மின் இருளில் இருந்து காப்பாற்றியுள்ளது. எதிர்காலத்தில் பருவநிலை மாற்றத்தால் ஏற்படும் இதுபோன்ற சவால்களைச் சமாளிக்க சூரிய ஒளி மின்சாரமே சிறந்த மாற்று என எரிசக்தி நிபுணர்கள் கருதுகின்றனர்.