ஆண்டுக்கு 1.6 பில்லியன் லாபம் என ஆய்வு… ஆனால் இது உண்மையா? சுவிஸில் வெடித்த விவாதம்!

ஆண்டுக்கு 1.6 பில்லியன் லாபம் என ஆய்வு… ஆனால் இது உண்மையா? சுவிஸில் வெடித்த விவாதம்!

சுவிட்சர்லாந்தில் புதிய அணுமின் நிலையம் கட்டும் திட்டம் மீண்டும் தீவிர விவாதத்தை ஏற்படுத்தியுள்ளது.

புதிய பொருளாதார ஆய்வு ஒன்றின்படி, ஒரு நவீன அணுமின் நிலையம் செயல்பாட்டுக்கு வந்தால், ஆண்டுதோறும் சுமார் 1.6 பில்லியன் சுவிஸ் பிராங்குகள் அளவுக்கு பொருளாதார நன்மை கிடைக்கும் என்றும், சுமார் 3,000 புதிய வேலைவாய்ப்புகள் உருவாகும் என்றும் கூறப்பட்டுள்ளது.

மேலும், வீடுகள் மற்றும் தொழிற்சாலைகளுக்கு மின்சாரக் கட்டணம் குறையலாம், அரசுக்கும் கூடுதல் வரி வருவாய் கிடைக்கலாம் என ஆய்வு தெரிவிக்கிறது. இந்த அணுமின் நிலையம் 2050-ஆம் ஆண்டில் செயல்படத் தொடங்கும் வகையில் திட்டமிடப்பட்டுள்ளது.

ஆனால், இந்தத் திட்டத்திற்கு கடும் எதிர்ப்பும் எழுந்துள்ளது. அரசு மிகப்பெரிய நிதி உதவி வழங்காமல் இந்தத் திட்டம் சாத்தியமில்லை என்றும், கட்டுமானச் செலவு 25 பில்லியன் சுவிஸ் பிராங்குகளை தாண்டக்கூடும் என்றும் நிபுணர்கள் எச்சரிக்கின்றனர்.

அதுமட்டுமல்லாமல், அணுக்கழிவுகளை பாதுகாப்பாக அகற்றுவது, விபத்து அபாயங்கள் மற்றும் நீண்டகால சுற்றுச்சூழல் பாதிப்புகள் போன்ற முக்கிய கேள்விகளுக்கு இந்த ஆய்வு போதுமான பதில் அளிக்கவில்லை என எதிர்க்கட்சிகளும் சுற்றுச்சூழல் அமைப்புகளும் குற்றம்சாட்டுகின்றன.

தற்போது சுவிட்சர்லாந்தில் புதிய அணுமின் நிலையங்கள் கட்ட தடை அமலில் உள்ளது. ஆனால் அந்தத் தடையை நீக்க வேண்டுமா என்பது குறித்து 2027ஆம் ஆண்டு நடைபெறவுள்ள பொதுவாக்கெடுப்பில் இறுதி முடிவு எடுக்கப்படும் என எதிர்பார்க்கப்படுகிறது.