எரிசக்தி விலை உயர்வால் சுவிட்சர்லாந்தில் வீட்டு வாடகைகள் மீண்டும் அதிகரிக்கலாம்
சுவிட்சர்லாந்தில் வீட்டு வாடகைகள் மீண்டும் உயரக்கூடும் என Raiffeisen வங்கி எச்சரிக்கை விடுத்துள்ளது.
மத்திய கிழக்கில் நடைபெற்று வரும் போர் காரணமாக எரிசக்தி விலைகள் உயர்ந்து வருவது, கட்டுமானச் செலவுகளை அதிகரிக்கும் அபாயத்தை உருவாக்கியுள்ளதாக வங்கி தெரிவித்துள்ளது. அதன் தாக்கம் இறுதியில் வீட்டு வாடகைகளிலும் பிரதிபலிக்கலாம் என பொருளாதார நிபுணர்கள் கூறுகின்றனர்.
எண்ணெய் விலையில் 10 சதவீத உயர்வு ஏற்பட்டால், கட்டுமான கட்டணங்கள் சுமார் 1 சதவீதம் வரை அதிகரிக்கும் என ரைஃபைசன் வங்கி மதிப்பிட்டுள்ளது. இதனால் புதிய வீடுகள் கட்டும் செலவு மேலும் உயரக்கூடும் என்பதால், ஏற்கனவே நிலவி வரும் வீட்டு பற்றாக்குறை பிரச்சினையும் தீவிரமடைய வாய்ப்புள்ளதாக தெரிவிக்கப்படுகிறது.
குறிப்பாக ஜெனீவா ஏரி பகுதி (Lake Geneva region) இந்த நிலைமையால் அதிகம் பாதிக்கப்படக்கூடிய பகுதியாக கருதப்படுகிறது. அங்கு காலியாக உள்ள வீடுகளின் விகிதம் வெறும் 0.6 சதவீதமாக மட்டுமே உள்ளதாக தெரிவிக்கப்படுகிறது. தேசிய சராசரி 1 சதவீதமாக இருக்கும் நிலையில், அந்தப் பகுதியில் புதிய கட்டுமானப் பணிகளும் வரலாற்றிலேயே குறைந்த அளவில் நடைபெற்று வருவதாக கூறப்படுகிறது.
சுவிட்சர்லாந்தின் பல நகரங்களில் ஏற்கனவே வாடகை வீடுகளுக்கான தேவை அதிகரித்துள்ள நிலையில், கட்டுமானச் செலவுகள் மேலும் உயர்ந்தால் பொதுமக்கள் மீது கூடுதல் பொருளாதார அழுத்தம் ஏற்படலாம் என நிபுணர்கள் எச்சரிக்கின்றனர்.
