சுவிட்சர்லாந்திலிருந்து ஹுர்கடாவுக்கு புதிய நேரடி விமான சேவை

January 5, 2026

எகிப்தின் சுற்றுலா நகரங்களுக்கு பயணிகளின் ஆர்வம் தொடர்ந்து உயர்ந்து வரும் நிலையில், Nesma Airlines தனது விமான வழித்தட வலையமைப்பை விரிவுபடுத்துவதாக அறிவித்துள்ளது. எகிப்தில் கடற்கரை விடுமுறைகளுக்கான தேவை அதிகமாக இருப்பதை கருத்தில் கொண்டு, ஹுர்கடாவுக்கும் சுவிட்சர்லாந்தின் சூரிச் மற்றும் பாசல் விமான நிலையங்களுக்கும் இடையில் புதிய நேரடி விமான சேவைகள் தொடங்கப்பட உள்ளன.

இந்த திட்டத்தின் முதல் கட்டமாக, (யூரோ ஏர்போர்ட் பாசல்–முல்ஹவுஸ்–ஃப்ரைபர்க்) EuroAirport Basel Mulhouse Freiburg-இலிருந்து எகிப்தின் பிரபல சுற்றுலா நகரமான Hurghada-வுக்கு ஜூன் 28 முதல் நேரடி விமானங்கள் இயக்கப்படவுள்ளன. இந்த சேவை வியாழக்கிழமைகளிலும் ஞாயிற்றுக்கிழமைகளிலும் நடைபெறுவதுடன், அக்டோபர் 15 வரை தொடரும் என தெரிவிக்கப்பட்டுள்ளது.

இதனைத் தொடர்ந்து, Zurich Airport-இலிருந்து ஹுர்கடாவுக்கான நேரடி விமானங்கள் ஜூலை 11 முதல் தொடங்கப்பட உள்ளன. இந்த விமானங்கள் புதன்கிழமைகளிலும் சனிக்கிழமைகளிலும் இயக்கப்படவுள்ளதுடன், அக்டோபர் 21 வரை பயணிகளுக்காக கிடைக்கும்.

செங்கடல் கரையோரத்தில் அமைந்துள்ள ஹுர்கடா, அதன் அழகிய கடற்கரைகள், டைவிங் மற்றும் ஓய்வுநேர சுற்றுலா வாய்ப்புகள் காரணமாக, ஐரோப்பிய பயணிகளிடையே பெரும் வரவேற்பைப் பெற்றுள்ளது. குறிப்பாக கோடை காலத்தில் சுவிட்சர்லாந்திலிருந்து எகிப்துக்கு பயணம் செய்யும் சுற்றுலாப் பயணிகளின் எண்ணிக்கை அதிகரித்து வரும் நிலையில், இந்த புதிய விமான சேவைகள் அவர்களுக்கு நேரத்தை மிச்சப்படுத்தும் வசதியான தேர்வாக அமையும் என எதிர்பார்க்கப்படுகிறது.

2026 ஆம் ஆண்டில் சுவிட்சர்லாந்து விமான நிலையங்களிலிருந்து தொடங்கும் மற்றும் வருகை தரும் புதிய விமான சேவைகள் குறித்து மேலும் பல அறிவிப்புகள் வெளியாகி வரும் நிலையில், Nesma Airlines-ன் இந்த முடிவு சுற்றுலா மற்றும் விமான போக்குவரத்து துறைகளில் முக்கியமான முன்னேற்றமாக பார்க்கப்படுகிறது.

January 5, 2026