இலங்கையில் ஹோட்டலில் தங்கியிருந்த 54 வெளிநாட்டவர்கள் கைது
இலங்கையில் இணையவழி மோசடி மற்றும் கணினி குற்றச்செயல்களில் ஈடுபட்டதாக சந்தேகிக்கப்படும் 54 வெளிநாட்டு பிரஜைகள் ஹிக்கடுவை – தொட்டந்தூவ பகுதியில் உள்ள சுற்றுலா ஹோட்டல் ஒன்றில் இருந்து இன்று (11) பிற்பகல் விசேட அதிரடிப்படையினரால் (STF) கைது செய்யப்பட்டுள்ளனர்.
கைது செய்யப்பட்டவர்களில் 35 இந்திய பிரஜைகளும் 19 நேபாள பிரஜைகளும் அடங்குவதாக இலங்கை பொலிஸார் தெரிவித்துள்ளனர். பூசா இராணுவ முகாமின் புலனாய்வு பிரிவிற்கு கிடைத்த தகவலின் அடிப்படையில், விசேட அதிரடிப்படையின் தென் மாகாண விசேட சுற்றிவளைப்பு பிரிவும் ஹிக்கடுவை பொலிஸாரும் இணைந்து இந்த திடீர் சோதனை நடவடிக்கையை மேற்கொண்டதாக தெரிவிக்கப்படுகிறது.
சந்தேகநபர்கள் தங்கியிருந்த ஹோட்டல் வளாகத்தில் மேற்கொள்ளப்பட்ட சோதனைகளின் போது சுமார் 200 கையடக்கத் தொலைபேசிகள் மற்றும் 25 மடிக்கணினிகள் பொலிஸ் காவலில் எடுக்கப்பட்டுள்ளன. இவ்வுபகரணங்கள் அனைத்தும் இணையவழி மோசடி, நிதி ஏமாற்று நடவடிக்கைகள் மற்றும் சைபர் குற்றச்செயல்களுடன் தொடர்புடையவையாக இருக்கலாம் என விசாரணை அதிகாரிகள் சந்தேகிக்கின்றனர்.
ஆரம்பக்கட்ட விசாரணைகளின் படி, சுற்றுலா விசாவில் இலங்கைக்கு வந்திருந்த இந்த வெளிநாட்டவர்கள் Online Scam, டிஜிட்டல் நிதி மோசடி மற்றும் சர்வதேச அளவிலான இணையவழி ஏமாற்று வலையமைப்புகளில் ஈடுபட்டிருக்கலாம் என தகவல்கள் வெளியாகியுள்ளன. குறிப்பாக சமூக வலைத்தளங்கள் மற்றும் போலியான முதலீட்டு திட்டங்கள் வழியாக வெளிநாட்டு நபர்களை குறிவைத்து பண மோசடிகள் மேற்கொள்ளப்பட்டிருக்கலாம் என்பதையும் அதிகாரிகள் ஆராய்ந்து வருகின்றனர்.
கைது செய்யப்பட்டவர்களிடம் இருந்து கைப்பற்றப்பட்ட மின்னணு சாதனங்கள் தொடர்பாக மேலதிக டிஜிட்டல் ஆய்வுகள் மேற்கொள்ளப்படவுள்ளதுடன், இந்த சம்பவம் தொடர்பான விசாரணைகளை ஹிக்கடுவை பொலிஸாரும் கணினி குற்றப்பிரிவு விசாரணைப் பிரிவான CCID அதிகாரிகளும் தொடர்ந்து முன்னெடுத்து வருகின்றனர்.
அண்மைக் காலங்களில் இலங்கையின் சுற்றுலா மையங்களை தளமாகக் கொண்டு வெளிநாட்டு பிரஜைகள் இணையவழி மோசடிகளில் ஈடுபடும் சம்பவங்கள் அதிகரித்து வருவதாக பாதுகாப்பு தரப்புகள் சுட்டிக்காட்டுகின்றன. இதன் காரணமாக சுற்றுலா தங்கும் விடுதிகள் மற்றும் குறுகியகால வாடகை தங்குமிடங்கள் மீது பாதுகாப்பு அமைப்புகள் விசேட கண்காணிப்பை தீவிரப்படுத்தியுள்ளன.
